All But Reality

Imagine a catchphrase here

Simple template. Background and Customization by Shihab Elagib. Powered by Blogger

April 13, 2015

Anti-Virus جديد!

"حان الان موعد تشوف برنامج حماية جديد بدل الزبالة الشغال بيه دة".
وان كان فعلياً الانذار دة ليه فترة طويلة شغال في راسي، الا انه تنفيذه (في جهازي الرئيسي) ما بقى ضروري الا امس، والسبب: مجرد وسواس قهري.
للسخرية، الوسواس اياه ما جاي من كونه البرنامج الشغال بيه حاليا (Security Essentials من مايكروسوفت) ماخد اسوأ التقديرات في اغلب -ان لم يكن كل-  مراجعات برامج الحماية المنتشرة في النت، بل جاي من انه البرنامج قرر يوم امس انه عاوز صلاحيات ادارية عشان يعمل عملية ما، واللي ابدا ما طلبها البرنامج (لغرض انا ما امرته يعمله) في قرابة ال4 سنين الانا شغال فيها به. 


شكوكي الrational انها مجرد bug او ابديت لأمر اخر في النظام احتاج انه يعمل restart لسيرفس البرنامج. لكن العقلانية ما دائما الخيار البنتبعه كبني ادمين، لذا قام وسواسي الانف ذكره يحاول يقنعني انه في حاجة غلط، ولازم البرنامج ديت يتشال ونشوف حاجة غيره. وقد كان.

توضيح: النص ادناه ليس Guide لإختيار برامج الحماية ولا يجب ان يؤخذ على انه كذلك. هذه مجرد مجموعة من الاراء الشخصية متخللة قصة قصيرة بأسلوب سرد لا يمت للبلاغة بصلة.

طبعا اولى الخطوات للبحث عن بدائل في الحالة ديت بتبقى قوقلة سريعة لـ"Top free Antivirus software 2015".
ايوة، "free".

"Free"، لأنه -حسب قوقلة سريعة في الموضوع- الفرق في الdetection rates بين التقديمات المجانية والأخرى البقروش ضئيلة وقد تكون منعدمة.
"Free"، لأنه ما عندي وقت، مزاج او اهتمام لمتابعة الكراكات والمفاتيح وباقي امور القرصنة اياها.
واهم حاجة: "Free" لأني مفلس :|

احتياجي لبرنامج انتيفايرس لا يعدو كونه "Anti-virus software". سوفتوير قاعد في الخلفية بيقبض الفايروسات المعروفة. انا ما محتاج برنامج لتسريع الكمبيوتر او تنظيفه، عندي هاردوير سريع جدا ومعرفة كافية بالويندوز لإنه انظفه و اعمل ليه maintenance براي.
في نفس الوقت، ما عندي حوجة لبرنامج firewall طرف ثالث. الفايروول المبني في الويندوز قائم بهذا الغرض بصورة كافية (لإحتياجي)
ما عندي حوجة لخدمات الweb security اياها. كما اقول دائما: "The best Antivirus is the one that comes pre-installed in your head"، ودي أحسن تطبيق  ليها بيبقى في تصفح الويب. القليل من العقلانية وبعض من الscepticism بتكفي انه الواحد يميز محاولة phishing من موقع سليم. غير انه المتصفحات الزمن دة (تحديدا Google Chrome) بقى بينذر المستخدم من المواقع الما ياها او المحتوية على ملفات خبيثة (كمثال، جرب نزل ملف EICAR). قد لا تكون ذات اعتمادية كاملة، لكنها مساعدة.
واخيراً، كحال اغلب المستخدمين البسيطين ما عندي حوجة كبيرة بكونه البرنامج يكون عنده دعم فني خنفشاري، الميزة الرئيسية الفاصلة بين البرامج المجانية والمدفوعة. للكثير من المشاكل مجرد قوقلة بسيطة بتمرق ليها حل، وللكثير الاخر القليل من الخبرة في التعامل مع الكمبيوترات بتحلها. لا ينفي انه ممكن تحصل مشاكل user-specific ما بتتحل، لكنها نادرة جدا.


البدائل الوصلت ليها بعد 10 دقائق تفتيش كانت النسخة المجانية من Bitdefender، Avira, Panda security, Avast, و AVG.

قديماً خياري الاول كان AVG، لكن للأسف الشركة قررت في فترة ما انها تتبع سياسة العقوبات الامريكية على السودان (او هكذا كان العذر زمان، ما عندي فكرة حاليا هو كيف لكن الموقع لا يزال مديني خطأ انه غير مسموح لي بالدخول :| ) فدة كان اول من طار في التصفيات.

على الرغم من انه الريفيوز ليه جميعها كانت ايجابية، الا انه عقليا "خليك في الاسم البتعرفه" اختصرت Panda Security free AV برة اللستة لأنه... الاسم ما عاجبني :|
نفس غباء العذر مشترك مع Avast، اللي برضو سمعته على ما يبدو كويسة، الا انه تاريخيا تجربتي معاه كانت سيئة، فبرضه طار. 

يبقى الموضوع وقف على اثنين: Bitdefender و Avira. الاثنين سمعتهم كويسة، والاثنين اسمهم ما غريب علي، والاثنين شركاتهم ما عندها مشاكل -داخلة في context الموضوع- مع السودان. وبما انه Avira هو المستخدم حاليا في جهازي الثانوي، قررت انزله. 
وما اشتغل...

زي الناس. فعلى ما يبدو البرنامج فيه "bug" متعلقة بتفعيل البرنامج بتضطر المستخدم يمسحه ويثبته تاني، اللي ما اشتغلت معاي برضو. لذا مشيت للخيار التاني: Bitdefender.
ودة بيذكرني بنقطة مهمة: الtrend الحايمة في السوفتوير الزمن ديت انه الناشر ما بيديك الinstaller package الكاملة للسوفتوير، بقدر ما بيديك برنامج صغير بيشتغل كعميل للتحميل ومن ثم مثبت. الفكرة قد يكون عندها مميزاتها، الا انها بتزيد layer اضافية لحدوث مشاكل في عملية التثبيت. اكثرها شيوعا كونه البرنامج الصغير اياه قلما يكون بيفهم حاجة في عملية تنظيم التحميل. ومع الاخذ في الاعتبار الثبات الخرافي للإنترنت في السودان، تم القصة براك!

محاولة تحميل bitdefender بدأت بعادتي اني افتش عن الstandalone installer، اللي اتضح لاحقا - بعد ما نزلته، ثبته، ظبطت الاعدادات وانتهيت من الابديت والمسح المبدئي للنظام - انه فقط للنسخة المدفوعة من البرنامج، وحيشتغل فترة تجريبية 30 يوم :|
بما اني اتعودت على مسح الانتيفايرسس واعادة تثبيتها، اتخاذ قرار مسح النسخة ديت مش كان عملية صعبة، الصعب كان اني اوافق على استخدام برنامج بتدفندر عشان انزل الانتيفايرس نفسه (الطريقة الوحيدة اللقيتها لتحميل النسخة المجانية). لكن اهو برضو، ورانا ايه؟
لحسن الحظ وعلى ما يبدو انه النسخة المجانية من البرنامج اياه basic لصورة شديدة، التحميل انتهى في فترة بسيطة جدا، وبما اني شغال على ssd فالتثبيت انتهى اسرع.
ولكن...
ما اتصدمت به عند تشغيل البرنامج، هو ان "basic" الاخيرة ديت الجماعة ماخدينها اكثر من اللازم. بعد دقيقتين من البحث في النافذة البسيطة للبرنامج ما لقيت اي طريقة لتعديل اي خيارات في البرنامج. وعلى الرغم من اني ما شايفها ضرورة قصوى اني احدد مستوى الheuristic analysis للسكانر، الا اني بتطلب على الاقل اقدر اتحكم في البرنامج حيعمل ايه في حالة الdetection :|
وزي ماقلت فوق، بقيت متعود على مسح الانتيفايرسات.

لسبب ما لكن، جاني مزاج ادي Avira تجربة تانية. غالبا عشان الUI بتاعه. على كل، مشيت للموقع ونزلت البرنامج الصغير اياه مرة تانية. خليته ينزل ملفاته (واحتاج طبعا اني اعيد التحميل في النص. زي ما قلت فوق: التطبيقات دي لا تفقه شيئا في تنظيم التحميل) ويتم التثبيت.... وإشتغل! :|
Score 1 for chaos theory!

حتى الأن ماف مشاكل تشغيلية قابلتني مع البرنامج، لكن لا يزال الوقت مبكرا لإصدار حكم نهائي. نشوف بعد شهر حيحصل ايه. ولكن بحكم خلفيتي المنعدمة في مجال امن المعلومات، غالبا الحكم اياه حيكون مبني بالكامل على كمية الصعوبات التقنية والتأثيرعلى باقي النظام. لغير هذا انا حأحاول اثق في ما يقوله "الخبراء" والقليل الذي اعرفه من علم الاحتمالات. لكن الشي الوحيد المتأكد منه 100% حاليا: من ناحية سهولة تحصل واستخدام: الMicrosoft Security Essentials زيه ماف :|


Toe-notes:
المصادر الرئيسية في الريسيرشز (or lack thereof) الفوق كانت:
AV-test.org
AV-comparatives.org
PCmag
Tomsguide