مذربورد ما بتدعم كرت؟ (الجزء الأول)

فيا سيدي حصل معاي في اليومين الفاتو انه قِيلَ لي انه الكرت الفلاني "ما compatible*" مع المذربورد العلانية. لكن اوفكورس، كوني انسان ليه خلفية بسيطة عن الموضوع دة، الكلام دة كان بيتعارض مع حاجات اساسية يفترض اي geek مهتم بتجميع أجهزة 

الكمبيوتر عارفها: الكروت والمذربوردات في التاشر سنة الأخيرة interchangable بصورة يمكن ان تعمم كلياً!

لما نتكلم عن دعم بين بلاتفورم (Platform، في الحالة دي اخده المذربورد والبروسيسر والـchipset) وملحقاته الطرفية، نحن بنتكلم من ثلاثة منطلقات: اولاً انه في حاجة بتخلي الجهتين ديل يتواصلو مع بعض، ثانياً انه في آلية بتخلي الطرفين ديل يفهمو كيف يستفيدو من بعض، واخيراً (مع انها تكنكالي أولاً، بس ما تركز) انه كيف تخلي الطرفين ديل مدركين بوجود بعض اساساً.

عشان ما أخلي الكلام كتير شديد، حأخلي كل جانب من الثلاثة الفوق ديل في بوست براه. في البوست دة نبداها من الأخر، كيف تخلي الطرفين ديل مدركين لوجود بعض.  الحكاية يا سيدي هي انه الكمبيوتر دة لما تبدا تشغله لازم تصحصح كذا مكوِّن جواه وتوصلهم بي بعض. دي وظيفة مكوِّن ظريف في المذربوردات اسمها الـBIOS (قديماً، حديثاً التكنولوجيا انتقلت لوريثه الـUEFI، لكن الفكرة العامة صحيحة لكليهما. وما تشغلها لي تقول البايوس دة فيرموير ما هاردوير). هو المسؤول من انه يحصر الهاردوير الموصل في الجهاز، يصحصح الهاردوير دة ويتأكد انه حي ولا ميت، وبعديها يمشي يشوف البوَّاب بتاع نظام التشغيل قاعد وين و ينكته من حتته ويسلمه لستة الهاردوير ويقول ليه يالا اتصرف.

في موضوعنا دة بالذات، اشكالية الـcompatibility بتظهر في حاجة بسيطة: الكمبيوتر ما حيعمل POST! الـPOST دة يا عزيزي هو المصطلح التقني الرنان للبري الكتير البيظهره ليك الكمبيوتر من لحظة تشغيله ولحد لحظة تظهر ليك علامة الويندوز. لما تكون في مشكلة أساسية في الهاردوير، الـPOST -على حسب قدرته- طوالي بيديك انذار ليها. بالنسبة للـGPUs إنذارها بسيطة جداً: الكرت ما حيطلع ليك صورة في الشاشة (احتمال يكون في انذار مكتوب برضو، لكن حتشوفوه كيف؟)

لكن يتهيأ لي انا فطيت النقطة الرئيسية، حتة انه مشاكل الـcompatibility هنا ما درامية. شايف معاي، كروت الشاشة بتجي بي BIOS حقتها براها (اسمها الـvideo BIOS) وظيفتها بس الكرت. يالا دي -في حالة كرت جاي من المصنع- ما ممكن تفترض فيها مشكلة compatibility. الـvideo BIOS دة المسؤول من الـinitialization بتاع الكرت ومنها بيسلم شغله للـdriver المتخصص لما نظام التشغيل يشتغل. يالا بالنسبة للـBIOS الرئيس كل البيعمله يصل للـvideo BIOS الدربو معروف دة، ويخليه يتصرف. 

للأمانة في اشكالية compatibility محتملة هنا، دي  قد تحصل لما يكون واحد من الـBIOSـين اياهم BIOS كلاسيكي عادي والتاني الـUEFI الجديد. التشديد على "قد" دي لأنه حتى في الحالة دي في امكانية cross compatibility. منظمة الـUEFI بتوصي انه للفترة الإنتقالية مصنعي الكروت مفروض يرفقو BIOS كلاسيكي و UEFI مع بعض في حاجة هجين وتخلي البلاتفورم المركب فيها الكرت يتصرف ينادي الحاجة العاوزها**. الحاجة التانية هي functionality في الـUEFI الرئيس حق البلاتفورم بتخليه يجي بإمكانية تعمل UEFI boot بكل الميزات حقت التكنولوجيا الجديدة، او ترجع لي "legacy boot" وتقوم تشغل الجهاز زي إنك شغال بي BIOS كلاسيكي.

في حاجة لازم تلاحظ ليها هنا، انه حتى لو في مشكلة "compatibility" من النوع الفات دة، الحاجة دي حكر بس على الـboot process. اذا قدرت تصل للنظام جوة (ممكن تخلي الـBIOS/UEFI ما يوقف الـPOST لما يكون في خطأ)، الدرايفر بتاع الكرت الـloaded مع النظام (بإفتراض انه ماف اشكالية هنا، دة موضوع في جانب تاني من الجوانب الثلاثة الفوق) بيستلم المفراكة وبيتصرف يشغل الهاردوير بطريقته (نظرياً على الأقل).

ولكن حتى ان اعتبرنا انه المشكلة دي ظاهرة منتشرة شديد، جدال الـcompatibility (في الجزئية دي من الثلاثة جوانب الذكرتها فوق) بيسقط تماماً لو الكرت ظهر ليك صورة في الشاشة لما تشغل الجهاز، لأنه دة بيعني، ببساطة، الـBIOS/UEFI بتاع البلاتفورم قدر يتفاهم مع الـBIOS/UEFI بتاع الكرت والإثنين يباصو الكورة لي ملعب نظام التشغيل! ودة موضوع لي زمن تاني.

فوت نوتس:

* = مصطلح compatible البديت بيه في الفقرة الاولى والكان حوله الخلاف كان مستخدم في صياغ انه الكرت ما بيشتغل at full capacity وانت جوة نظام التشغيل. باقي البوست بديهياً بتكلم عن الـPre-operating system environment، هنا صراحة استخدامي لي compatible بقى جايط شوية. ربما مع البوستات الجاية الـdistinction بين الحالتين بيبقى اوضح شوية.

** = حتة انه في كرت ما بيشتغل الا مع بلاتفورم بي UEFI دي مسألة فيها خلاف في الانترنت. ماف اتفاق على كدة ولا كدة. هذا وقد قيل، المنطق بيقول انه اي مصنع ما عاوز يقلل السوق المتاح ليه حيحاول يدعم اكبر كمية ممكنة من الأجهزة، ولو فتشت في النت حتلقى شهادات بتوري انه كروت من اجيال as recent as Geforce 900 series مستخدمة في اجهزة بـBIOS  كلاسيكي. انا شخصياً مجرب كرت GTX 780 Ti في مذربورد قديمة بدون مشاكل POSTing. الكرت المذكور في الخلاف الفوق كان GT 610 تافه، ولا حتى كرت من معمارية كيبلر وانما كرت من معمارية فيرمي الأقدم (المستخدمة في سلاسل الـ500 والـ400) متنكراً.

شخصياً يتهيأ لي في misconception حاصل في حتة الـ"UEFI compatibility" البتجي حايمة مع الكروت الحديثة، إفتراض انه دة بيعني انه الكرت بيتطلب البلاتفورم يكون UEFI-based، بينما القصد هو ان الكرت دة لو عندك جهاز UEFI-based ممكن تستفيد من المميزات بتاعته (الـbooting الأسرع، الـsecure-boot، الخ). مسألة تجميع الكمبيوترات دي فيها تعقيدات ممكن تطلع بـsymptoms الواحد يدقس يختها لسبب تاني غير سببها. شخصياً قلت اخلي الاحتمال قاعد واذكر البرنامج دة، hence "قد" الـemphasized الفوق ديك. واكرر تاني، حتى ان كان دة موضوع مسلم بيه، مجرد ظهور شاشة الـPOST بيجدع الاتهام دة بالشباك.

جهازي القديم (circa 2011) :'(